ИФТИТОҲИ САРДХОНАИ МУОСИРИ “СОМОН АГРО САНОАТ”

Кушониён: Ташаббусҳои ҳизбӣ  

Санаи 14 декабри соли ҷорӣ Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар деҳаи Файзи Истиқлоли ноҳия сардхонаи муосири Ҷамъияти дорои масъулияти маҳдуди ташкилоти ибтидоии ҳизбии“Сомон Агро Саноат”-ро мавриди истифода қарор доданд.

Иттилло бояд дод, ки сардхона дар доираи дастуру супоришҳои Сарвари давлат муҳтарам Эмомалӣ Раҳмон ба истиқболи 35-солагии Истиқлоли давлатӣ бо маблағгузории ширкати “Сомон Агро Саноат” бунёд гардида, имкони дар шароити хуб нигоҳубинии то 2 ҳазор тонна меваю сабзавотро доро мебошад.

Бояд гуфт, ки масоҳати дохили сардхона дар ду марҳила беш аз 2 ҳазор метри мураббаъро ташкил намуда, дар умум дар он зиёда аз 4 ҳазору 500 тонна меваю сабзавот ҷойгир карда хоҳад шуд. Масоҳати умумии ҳудуди сардхона 5 ҳазору 200 метри мураббаъро ташкил намуда, он бо дастгоҳҳои худидорашавандаи замони муосир муҷаҳҳаз шудаст.

Дастгоҳҳои замонавӣ, аз кишварҳои Туркия ва Италия ворид гардида, ҳарорати дохили сардхонаро аз 5 дараҷа гармӣ то 10 дараҷа хунукӣ нигоҳ медорад. Чунин шароит имкон медиҳад, ки меваю сабзавот тару тоза ва бо сифати аъло нигоҳ дошта шавад. Бо мавриди истифода қарор гирифтани марҳилаи аввали иншооти мазкур беш аз 10 нафар сокини маҳаллӣ бо ҷойи кори доимӣ ва маоши хуб таъмин шуданд.

Сарвари давлат муҳтарам Эмомалӣ Раҳмон дар ҳамин ҷо аз намоиши маҳсулоти кишоварзӣ дидан карданд. Дар намоиш асосан молу маҳсулоте, ки имконияти нигоҳубини онҳо дар сардхона мавҷуд аст, муаррифӣ карда шуд, ки аз анвои гуногуни маҳсулоти кишоварзӣ, аз ҷумла, навъҳои гуногуни ангур, бодирингу помидор, себу нок, лиму ва дигар номгӯи маҳсулот иборат буд.

Пешвои миллат муҳтарам Эмомалӣ Раҳмон ҳамчунин ба ташаббуси соҳибкорон ҷиҳати бунёди сардхона, пешгирии талафёбии маҳсулот ва таъмини бозор бо меваю сабзавоти аз лиҳози экологӣ тозаи ватанӣ дар ҳама фаслҳои сол баҳои баланд дода, бунёди сардхонаи муосирро амри муҳим арзёбӣ карданд.